2015/11/11 即時新聞

蘋果日報 即時新聞
【四季補擺喜酒】古巨基型仔現身 handmade現場佈置

(攝影:王連連)(蘋果日報)
今日雙11光棍節,除咗好多藝人報喜公佈結婚,亦係古巨基同老婆Lorraine補擺喜酒嘅日子,於四季酒店宴請賓客。

今日做兄弟嘅雷頌德同森美早早到咗,霍汶希(Mani)亦著靚靚到場,場內佈置以白色為主,有綴滿鮮花嘅白色鋼琴,backdrop仲有基仔同Lorraine嘅卡通,相信係出自畫畫了得嘅基仔手筆。

下午近4點,基仔帶住一班兄弟出嚟會見傳媒,新郎哥上身著上白色禮服sharp醒,不過古太就應該忙住裝身未有出嚟。

相信呢幅畫係出自基仔手筆

現場佈置以白色為主


新郎哥出嚟啦!原來子華(左三)同基仔老友到做兄弟。
~
蘋果日報 即時新聞
【堅過石堅】場內外圖畫 古巨基一比一親手畫
建立時間: 1111 16:34

(攝影:陳志嵐,王連連)(蘋果日報)
今日古巨基同老婆Lorraine喺四季酒台補擺喜酒,下午4點基仔率兄弟團出嚟見傳媒。

記者問一班兄弟今朝有冇接新娘,點知佢哋話未見過新娘,搞到哄堂大笑,然後森美話:「有見過,佢哋乜嘢自己親力親為,畫自己畫,咩都係自己搬返好佢,見到每一樣都係自己經手,好離譜。」

記者問:「咁今日你哋班兄弟淨係影相?」佢哋笑言一對新人有幫佢哋揀內衣褲,森美話:「今次佢入面有場景係古生親自畫,好似幸福小街,黑白色一比一咁畫,呢幅圖(指backdrop)都係自己畫,有3個小舖,餅店,boutique同音樂室,代表佢嘅夢想。」

問到今晚有咩環節,子華就話:「今晚好直接,飲一杯再飲多杯。」唔會表演?佢哋話:「佢係會表演,如果徇眾要求。」唔唱歌?森美話:「應該唱返首歌比新娘。」劉翔就表示:「有可能今天晚上,古巨基還會有一段肺腑之言,表達他們多年的感情。」

記者再笑問一班兄弟內衣褲都有人幫手揀仲有咩貢獻?子華即爆肚:「我哋嘅存在都係一個驚喜嚟嘅,一個最冇運動細胞嘅人,同最有運動細胞嘅人(眾人笑爆),我講一列冇運動,同呢幾邊有運動細胞嘅人。」

親手畫o架!

好勁!

~
蘋果日報 即時新聞
【四季補擺喜酒】7月12號簽紙!
新娘Lorraine戴7.12卡鑽戒

建立時間: 1111 17:49
古巨基今日喺中環四季酒店補擺喜酒,以雞尾酒會形式進行,請晒至親好友見證佢同老婆陳英雪(Lorraine)嘅幸福,兄弟團仲有雷頌德、森美、蘇有朋及黃子華等。

基仔今日左手戴求婚及結婚戒指,新娘子Lorraine嘅婚戒就7.12卡鑽戒,因為佢哋係7月12號簽紙。另外,基仔同Lorraine仲為在場半百傳媒準備咗餐盒,以及送上禮盒。

新娘Lorraine戴7.12卡鑽戒。



~
蘋果日報 即時新聞
【補擺喜酒】吳婉芳驚艷到場 大風吹嘉賓狼狽
建立時間: 1111 18:24

陳豪陳茵媺夫婦、傅明憲同吳婉芳等人今晚都有去飲基仔(小圖)嗰餐。(攝影:陳志嵐)(蘋果日報)
古巨基同助手陳英雪(Lorraine)今日喺四季補擺喜酒,好多圈中人都畀面到賀,兄弟團陣容當然強,有欄王劉翔、台灣歌手蘇有朋、男神黃子華、名音樂人雷頌德(Mark)、DJ森美同大台主持人吳家樂咁,已經好有睇頭。

至於去飲嘅嘉賓,都粒粒皆星,有啱啱宣佈再度成功造人嘅陳豪陳茵媺夫婦、名媛吳婉芳(1986年港姐亞軍兼最上鏡小姐及才華小姐)、上月新婚嘅錢國偉陳宛蔚夫婦、傅明憲、金牌經理人霍汶希(Mani)、「Benz雄」許紹雄、李克勤、蔡卓妍(阿Sa)、豹哥豹嫂單立文胡蓓蔚夫婦、叻哥陳百祥同秀姑、前大台「新五虎」朱健鈞、Mark嫂梁家玉(Jade)等等。

當中最吸引嘅就要數吳婉芳,雖然佢已經48歲,但嫁入豪門嘅佢保養得宜,個樣同當年選港姐嗰陣差無幾!(可能o依家仲靚咗)另外,同係港姐出身嘅蔡少芬雖然單拖現身,但佢個大露背一樣搶去唔少風頭。

而傅明憲同Mark嫂不約而同着咗條半透視裙到場,打扮靚靚,Mark嫂仲露咗少少腰,可惜佢哋影相時分別遇上一陣強風,吹到佢哋頭髮亂了。陳豪就小心翼翼拖住老婆陳茵媺行,sweet嘅程度媲美擺酒主角㗎!

基仔老婆Lorraine向來好怕羞,今日補擺喜酒都冇同基仔一齊見傳媒,雷頌德仲搞笑指自己都冇見過新娘,但森美解釋因為基仔同Lorraine搞婚禮咩都親力親為,因為佢哋都好忙。

咁李克勤就勁喇,克勤約下午5點半到場,剛才貼出佢同一對新人嘅相,留言:「恭喜一對俊男美女,祝白頭到老,快啲生番幾個小畫家啦!」相信克勤係第一個po古太相上網嘅人。



Mani一早到場

新娘怕醜唔見人,劉翔就同基仔蹺手扮新人

男神黃子華(右)畀面做兄弟,成件事型晒!

克勤喺社交網站po基仔夫婦嘅合照,巧威威!(互聯網圖片)
~
蘋果日報 即時新聞
【基仔擺酒】沈月大個女晒腿 軒仔叫Ivana生隊籃球隊
建立時間: 1111 19:35
古巨基同助手陳英雪(Lorraine)今日喺四季補擺喜酒,好多圈中人都畀面到賀,當中有好多都意想不到,原來咁熟嘅賓客,好似黃子華咁,做基仔兄弟,原來佢哋一齊拍過電影《衝鋒車》,之但係其實又冇對手戲,竟然friend到做兄弟。

賓客名單一直都friend嘅組有:周慧敏帶老公倪震出席,英皇一班藝人好似容祖兒同張敬軒以及一班後輩歌手好似泳兒同鍾舒漫等,仲有一直都friend開嘅鄺美雲。

但亦有組係諗爆頭都唔知佢哋因咩場合/作品而friend嘅,就好似帶住大女沈月嚟飲嘅邱淑貞,周汶錡,唐詩詠,詹瑞文,黃真真同賭王四太梁安琪。

古巨基又冇拍過黃真真嘅戲,亦冇跟詹瑞文上堂,另外雖然基仔話以前幫大台主持《娛樂新聞眼》,但點都諗唔到佢點樣會同呢代大台花旦唐詩詠有交流,邱淑貞同周汶錡同基仔熟就更加令人驚奇。

另外仲有梁家樹夫婦,蘇志威,蔡一智夫婦,劉偉強,小美同排舞師Sunny wong,古天樂,吳君如,莫文蔚等等。

張敬軒接受訪問就話:「因為兩個都好熟,今日係比人情,覺得佢哋乜都有,本來諗住買得意嘢,但覺得佢哋有好多玩具,所以最終都冇買。」問到王菀之都宣佈結婚,佢笑言:「搞到我都想宣佈『昏』訊。」

問佢知唔知Ivana結婚,佢話:「一早就知,都戥佢開心。」你做兄弟定姊妹?佢話:「姊妹或者伴娘,塞啲嘢喺上面。」係咪4月求婚o架?軒仔話:「佢冇刻意講,不過大家傾密計聽佢講起。」Ivana打算生B?佢話:「最好生啦,生多幾個,目測王小姐個圓周都可以生隊足球隊,都係唔好啦,籃球隊啦,生到佢腳軟。」請定假準備去婚禮?佢話:「唔知喎,我都唔係好記得個日子。」
~
蘋果日報 即時新聞
【基仔擺酒】祖兒指基仔不缺錢
聞Ivana結婚好激動

建立時間: 1111 19:40
繼續係古巨基同Lorraine喺四季補擺喜酒,今晚基仔擺酒可謂星光熠熠,除咗英皇老闆楊受成夫婦外﹑仲有林峯﹑卓韻芝﹑張敬軒﹑容祖兒﹑邱淑貞同囡囡﹑周慧敏﹑倪震﹑賭王四太梁安琪﹑邵音音﹑黎小田﹑洪天明同大仔﹑杜德偉夫婦﹑林欣彤﹑張致恒﹑蘇志威﹑溫碧霞﹑譚玉瑛﹑車婉婉﹑梁家樹夫婦﹑蔡一智夫婦﹑鍾欣潼等等等等,真係陸續有嚟呀﹗

祖兒表示今日剛由北京返港,問佢係咪趕返嚟?佢笑言:「唔算好趕,不過怕航班會Delay,如果係真,就係『古Delay』。」

問佢送乜嘢畀新人?祖兒話送咗份心意:「因為佢哋係不缺錢朋友,都唔知送乜,我以佢哋名義捐款去一個慈善機構,用咗五位數字,祝一對新人百年好合,永結同心,快啲生小朋友。」

另外,講到王菀之結婚,佢話:「係呀,我知呀,我聽到消息好激動,喺Instagram祝福咗佢。」咁有冇聽過佢話結婚?祖兒笑言:「成日聽佢講恨嫁,睇佢個勢唔等得嗰啲,搵到如意郎君好戥佢高興,佢哋價值觀一樣,兩個又鍾意藝術品,互相扶持好好,戥佢哋開心,希望佢哋生BB,恨見到佢哋係矇豬眼BB」
~
蘋果日報 即時新聞
【add即時.尚】古太披蕾絲嫁衣 襯訂製Tiffany鑽飾
最後更新: 1111 19:58 / 建立時間: 1111 18:00

今日雙11光棍節,古巨基同老婆Lorraine(陳映雪)在中環四千季酒店補擺喜酒。

上年7月古巨基宣布和助手女友Lorraine在美國拉斯維加斯註冊結婚,結束20年愛情長跑,還影了一輯婚紗相,當時新娘子揀了日牌Comme des Garcons的過季白裙做婚紗,幾破格。

今日古太今日就穿上一套白色蕾絲婚紗,裙襬的cutting同之前影婚紗相那一套有點相似,不過就多了一件小cape,設計優雅又具復古味,古太更以蕾絲白襪襯高踭鞋,感覺好sweet噃!新娘look當然唔少得鑽飾,古太就襯了Tiffany & Co.的鑽石戒指、鑽石項鍊、鑽石手鐲、結婚對戒等,Lorraine更別出心裁將兩隻不同形態的鑽石蜻蜓胸針當頭飾。


古太戴上Tiffany的鑽石首飾,最特別是將心口針當頭飾。


古太的蕾絲婚紗襯上小披肩,帶點復古感。


加埋基仔手畫的佈景,超sweet!


去年在美國影婚紗相。


Comme des Garcons 2012 春夏系列做婚紗。
~
蘋果日報 即時新聞
幾時娶千語BB?
林峯:我仲有啲時間成家立室


講起基仔今日補擺酒,林峯話自己唔急結婚。(攝影:陳志嵐、陳慧安 / 資料圖片)(蘋果日報)

林峯﹑張敬軒﹑林嘉欣同林德信等,今晚去咗中環出席周刊週年誌慶活動,其他嘉賓仲有吳綺莉同囡囡吳卓林、鄺美雲、譚耀文、王宗堯、關心妍同老公楊長智、溫碧霞等,亞視執行董事葉家寶率領蔡國威、劉錫賢、張家瑩等。

林峯早排拍新歌MV時,搞到手臂被灼傷,女友吳千語應該好心痛。講起呢排咁多藝人結婚,連林峯同公司嘅古巨基,今日都補擺喜酒,林峯話:「基仔大我幾歲,我仲有啲時間成家立室,小朋友大個咗,我仲有力氣同佢去玩同踢波,隨緣啦,BB(指吳千語)都做緊手頭上工作拍電影。」
~
蘋果日報 即時新聞
君如恭喜Ivana搵到好男人
軒仔暗示反串做姊妹

吳君如﹑張敬軒﹑古天樂及周慧敏等,今日出席古巨基同Lorraine婚宴,君如離開酒店時,講到王菀之(Ivana)同Eric So結婚,曾與Ivana合作《金雞SSS》嘅君如表示:「戥佢開心,佢搵到另一半咁愛佢,Ivana同我講,話個男仔喺金像獎前一日向佢求婚,因為怕自己攞唔到獎,我就同Ivana講,呢個男人真係好愛你,怕你攞唔到獎,但佢用下半生嚟0氹你開心,搵到一個好男人。」

君如仲問Ivana婚後拍戲有冇底線?君如再話:「Ivana笑言要睇下係邊條線,就算結咗婚都會繼續拍戲。」咁係咪11月28日去婚禮?君如話:「哎呀,我唔知呀,(攞假去婚禮?)唔知呀,佢都未邀請我,但點都係高興。」

至於張敬軒出席雜誌周年慶典時表示,今日雙喜臨門,基仔結婚之餘王菀之爆婚訊,軒仔話:「知道Ivana有結婚意向,好開心!搞到我都想立刻宣布『婚訊』,昏迷個昏,好高興一直睇住Ivana情海翻波到找到對的人,Eric係冇得頂嘅人,好人又體貼,Ivana會好幸福。」

至於擺酒日軒仔表示未確定,因為兩邊都大家族,仲默認會反串做姊妹,笑言:「我要keep定fit,我一定係Ivana嗰邊啲人。」
~
蘋果日報 即時新聞
【喜悅之淚】拖住老婆唱情歌
古巨基夫婦淚灑婚宴

建立時間: 1111 21:33
古巨基同Lorraine今晚喺中環四季酒店補擺喜宴,唔少圈中好友前往恭賀,星光熠熠﹗

基仔兩公婆喺婚宴上相當感性,流下喜悅之淚,基仔喺台上提到與Lorraine拍拖多年,點解突然要結婚?原來係佢有次同Lorraine去踩單車,Lorraine不慎跌親,連頭盔都裂了,當時覺得好危險,一定要珍惜,所以決定結婚。而基仔今晚拖着老婆Lorraine隻手唱《我與你》,兩夫婦都忍唔住喊,場面感人﹗

另外,吳君如﹑周慧敏﹑黃子華﹑倪震及張敬軒等,今晚都有出席古巨基與Lorraine婚宴,君如離開時表示,婚禮現場好溫馨感人,戥一對新人高興,佢又話Lorraine有喊,君如話:「因為佢一直用背脊對住賓客,點解佢(指Lorraine)背住我哋咁耐,原來佢淚流滿面,不過新娘好靚,婚紗好脫俗,冇乜點化妝,通常新娘化妝比較濃妝,佢好脫俗好清新。」而黃子華離開酒店亦表示古生古太都有喊,場面感動。

古巨基同Lorraine喺婚宴上禁不住流下喜悅之淚。

合巹交杯

同太太拖手唱情歌。

君如讚新娘Lorraine好脫俗。
~
Powered by Discuz!7.0 Design by loveucn.com
基本色 ( 京ICP备15028471号)|联系我们 |WAP
GMT+8, 2017-10-24 19:13, Processed in 0.008500 second(s), 6 queries