2015/10/13 即時新聞

on.cc
周慧敏爆Lorraine係工作狂:禮服都未搞掂
10月13日(二) 16:57
【on.cc東網專訊】 周慧敏以代言人身分出席護膚品牌活動,她表示因轉天氣冷病了,她說:「冷親感冒,我每逢轉天氣就係咁。(係咪無做運動?)我有呀,一個星期做3次,喺跑步機快行,唔係無做運動架,應該唔關事,係我體質一轉天氣就病。(老公有無好緊張?)佢已經就晒我啲溫度,我哋都有一齊去行山,係我自己跟唔到佢嘅節拍,行斜路佢行先,到咁上下佢就落嚟接我,上斜路我就難啲。2012年我哋去西乃山都係行上頂睇日出,深夜就出發開始行。(有無行到唔舒服?)ok喎,我覺得好舒服,睇日出好暖。(想唔想再行多次?)可以再行,行吓香港啲山先,都有啲挑戰,我又ready,可以試吓。(行山可以捕獲發哥周潤發。)佢喺邊度行?幫我查探下佢嘅位置,等我去遇吓佢,我唔會selfie,唔會打擾佢。(但佢會同你selfie。)佢好鍾意架?如果佢鍾意我會配合,不過唔好喺我流晒汗先嚟,我都好耐無見佢喇。」

問到她明年入行30周年可會舉行演唱會,她說:「Lorraine(古巨基太太,她的經理人)日日都問我,佢明明要搞自己個婚禮,但都每日追問,我依家冬眠吓先,諗住拖到年尾先答佢。搞嘅話都開心嘅,唔搞就工作冇咁heavy,如果唔搞又唔知fans會唔會失望,未決定,心大心細。Lorraine喺佢哋嘅大日子仲安排咗工作畀我,佢冇諗過我好想出席佢哋嘅婚禮。佢一向都工作行先,佢自己就放第二位,但係我就覺得佢嘅大日子好重要。上次同今次我都去唔到,要睇佢點補償。(會唔會覺得可惜?)要睇佢點補償先,至再衡量可唔可惜。(你老公去做代表?)我當然想同老公一齊去祝福佢哋。(一係你推job出席?)你哋問佢,唔係我話事,我好尊重佢。(會唔會原來係喺佢哋個台上唱歌?)你諗多咗喇。(買定禮物送畀佢哋?)都諗緊,佢哋咩都有,基仔又咁叻設計,我依家都好頭痛,要諗啲特別嘅禮物,本來想送首歌《伯拉河》畀佢哋,但係佢哋已經有首歌喇,我唔敢話我隻歌係畀佢哋嘅,自己收埋喺心底裏,再諗吓送咩。唔使急,佢自己嘅禮服都未搞掂,Lorraine每日都繼續安排工作畀我。」
~
Powered by Discuz!7.0 Design by loveucn.com
基本色 ( 京ICP备15028471号)|联系我们 |WAP
GMT+8, 2017-10-24 19:11, Processed in 0.005678 second(s), 6 queries