蘋果日報 即時新聞
【基仔擺酒】周慧敏聽台上愛的宣言感動
建立時間: 1111 21:28

周慧敏(Vivian)老公倪震今晚齊齊去到四季酒店出席老友古巨基嘅婚宴,佢夜晚近9點離開時接受訪問,問佢場內場面係咪好感人,佢話:「係,自己未去到感動位時已好感動。佢喺台上講點解決定結婚,因為某啲事。嚟到睇到呢個場面係無價,祝佢哋白頭到老。」

現場聽見Vivian把聲仲好似好感動?佢話:「現場好凍,可能冷親。」送咩禮物俾基仔?佢話:「諗咗好耐,我都唔想亂買嘢,佢哋兩個都好有個人喜好,最終都係送禮卷,大家都係好close嘅朋友,平時交往都係不拘小節。」

據知基仔喺台上係講點解兩個人會結婚,係因為有次去踩單車,Lorraine跌低,頭盔都裂埋,嗰時覺得要珍惜,所以2個人決定結婚。
~
蘋果日報 即時新聞
【有兄弟冇姊妹】老婆怕醜唔見人 古巨基:搣咗佢兩下
今日古巨基同老婆Lorraine補擺喜酒,現場backdrop有一幅大形人像畫同2樓ball room出面佈置都係基仔親手畫,認真犀利。

不過下午基仔率兄弟見人,Lorraine就冇落嚟,基仔話:「已經o氹咗佢,但佢怕見到鏡頭會緊張,所以同我講諗個方法,見記者之前發相比傳媒,搵啲兄弟幫手頂,搣咗佢兩下,o氹咗佢都係話緊張。」

咁新娘有冇姊妹團?基仔話:「今日冇姊妹團,係好特殊,因為舊年都註咗冊,只係同朋友分享喜悅,今日唔會好似之前人哋接新娘嗰啲,總之因為都結咗一年,今日兄弟好支持我,幫古太頂見記者,多謝佢哋,仲有朋友特登飛過嚟。」

現場佈置畫咗一條幸福小街,基仔表示:「有3間舖,因為呢啲紀錄我哋心血結晶品,影相留念,backdrop畫咗8個鐘,連埋ballroom花咗好幾日,生日蛋糕都係我整,同埋做咗首歌,叫《我與妳》,紀念咗婚前心情,會當回禮禮物送俾客人。」

有冇愛的宣言?基仔話:「其實噚晚現場佈置,劉翔有陪我,佢知道今晚會講廣東話,佢未必聽得明,同佢講一次先。」劉翔有咩反應?佢話:「佢都話感動。」會講啲咩愛的宣言?基仔表示:「本來想喺台上講,平時啲人講愛的宣言,我唔會講,會唱。」

新娘子Lorraine怕醜冇出嚟見人

只係發咗相比傳媒



場內佈置都係基仔自己親手畫!!!


~
蘋果日報 即時新聞
【梁浸浸勁搶鏡】古巨基擺酒 凍齡女神大合集
今晚古巨基喺四季補擺喜酒,宴請圈中好友同佢一齊分享喜悅,不少名人明星到賀,幾乎娛圈總動員現身,亦令人發現原來古氏伉儷果真人緣甚廣,好多表現上同基仔扯唔埋嘅賓客,如賭王四太梁安琪、邱淑貞、黃子華(合拍《衝鋒車》但冇一齊嘅場口)、陳豪陳茵媺、溫碧霞等都來恭喜一對璧人,非常熱鬧。

另一奇景係今晚呢個婚宴就係,雖然有邀請傳媒採訪,大家一齊企門口影賓客,星光熠熠,但就唔見新娘子Lorraine,因為新娘子怕醜,所以唔肯出嚟受訪,所以大家只能夠喺大會發相同嘉賓嘅微博貼圖,一睹古太嘅新娘look。

不過呢,今晚仲有一位非常搶鏡嘅客人,人見人愛,個個爭住抱抱,就連阿Sa蔡卓妍母愛亦被激愛,佢就係——Yumiko個寶貝女梁浸浸,難得呢位小朋友又唔怕生保,任抱唔嬲,可愛到暈。同場加映一眾凍齡女神鬥「無齡感」(呢個term係陳雅倫教嘅),包括周慧敏、溫碧霞、邱淑貞、陳妙瑛等等等等,睇嚟古氏伉儷知己良朋嘅年齡層都好廣吓喎。




關心妍夫婦


倪震、周慧敏

祖兒

森美同人妻陳敏之
~
蘋果日報 即時新聞
【原來fd 㗎?】黃子華做古巨基兄弟:我食咗佢好多曲奇餅,要還!
今日古巨基喺中環四季酒店補擺喜酒,以雞尾酒會形式進行,宴請至親好友見證佢同陳英雪(Lorraine)嘅甜蜜幸福。一眾兄弟團包括雷頌德、森美、蘇有朋等等,仲有黃子華。咦,原來子華男神同古巨基係fd 0架!唔通係因為拍《衝鋒車》?

子華笑笑口解釋點解今日幫古巨基做兄弟,佢話:「都係行街撞到嘅,基本上你好難撞到我0架嘛,我又好難撞到佢,咁大家撞到,相認咗之後,我記得佢今日結婚,我話:『你好似冇請我喎!』咁佢話:『咁你不如做兄弟吖!』」唔信?子華再話:「我哋呢啲,難得到依家仲有人搵我做兄弟,真係……我唔可以同你講喺邊條街行,因為我已經唔記得邊條街喇。」

兩人曾合作拍《衝鋒車》,但子華喺上映版係全刪(你懂的),而且兩人於戲中冇對手戲,故今次特登做基仔兄弟,補番個緣份。「我食咗佢好多曲奇餅,真係要還。同埋今日真係好高興,我上個禮拜同佢食飯,佢食兩嘢就話走喇,唔夠瞓,因為今日所有嘢……我未聽過今日所有嘢都係新郎哥自己做出嚟嘅。佢係話要睇住人搭起啲嘢,我諗以後啲人結婚會好大壓力。」

咁子華結婚之日,會唔會都係咁緊張呢?佢話:「我就一啲壓力都冇!」

採訪、攝影:王連連、馬建華、陳志嵐、陳順禎、馮嘉銘


子華男神笑言係喺條街撞到古巨基,一拍即合就做咗今日婚宴嘅兄弟喇。
~
Powered by Discuz!7.0 Design by loveucn.com
基本色 ( 京ICP备15028471号)|联系我们 |WAP
GMT+8, 2017-10-24 08:14, Processed in 0.006725 second(s), 7 queries